ნევილოლი H / NEVILOL H

ნევილოლი  H (Nevilol H) 5მგ/12.5მგ შემოგარსული ტაბლეტები

ნევილოლი  H (Nevilol H) 5მგ/25მგ შემოგარსული ტაბლეტები

ნებივოლოლი/ჰიდროქლოროთიაზიდი

პრეპარატის მიღებამდე ყურადღებით გაეცანით ინსტრუქციას, რადგანაც ის შეიცავს თქვენთვის მნიშვნელოვან ინფორმაციას

• შეინახეთ ინსტრუქცია. შეიძლება დაგჭირდეთ მისი გადაკითხვა.
• დამატებითი შეკითხვების შემთხვევაში, მიმართეთ მკურნალ ექიმს ან ფარმაცევტს.
• აღნიშნული მედიკამენტი დაგენიშნათ თქვენ. არ მისცეთ სხვებს. შეიძლება ზიანი მიაყენოს მათ, იმ შემთხევაშიც კი,  თუ მათი სიმპტომები თქვენსას ჰგავს.
• ნებისმიერი გვერდითი მოვლენის განვითარების შემთხვევაში, ან თუ შენიშნეთ გვერდითი მოვლენა, რომელიც არ არის აქ აღწერილი, დაუკავშირდით მკურნალ ექიმს მე-4 პუნქტი.  იხილეთ მე-4 პუნქტი.

შინაარსი:

• რა არის ნევილოლი H და რა დროს გამოიყენება
• რა უნდა იცოდეთ ნევილოლი H-ის  მიღებამდე
• როგორ მივიღოთ ნევილოლი H
• მოსალოდნელი გვერდითი ეფექტები
• როგორ შევინახოთ ნევილოლი H
• შეფუთვის შემადგენლობა და დამატებითი ინფორმაცია

1. რა არის ნევილოლი H და რა დროს გამოიყენება

ნევილოლი  H-ს აქტიური ინგრედიენტებია:  ნებივოლოლი და ჰიდროქლოროთიაზიდი.

• ნებივოლოლი მიეკუთვნება სელექციურ ბეტაბლოკატორების ჯგუფს (ე.ი. ახდენს სელექციურ მოქმედებას გულ­სისხლძარღვთა სისტემაზე). ამცირებს გულის შეკუმშვათა სიხშირეს. აგრეთვე აფართოვებს სისხლძარღვებს, რაც ხელს უწყობს არტერიული წნევის დაქვეითებას.
• ჰიდროქლოროთიაზიდი მიეკუთვნება შარდმდენ საშუალებებს და ზრდის გამომუშავებული შარდის რაოდენობას.

ნევილოლი  H  წარმოადგენს ნებივოლოლისა და ჰიდროქლოროთიაზიდის კომბინირებულ პრეპარატს და გამოიყენება მომატებული არტერიული წნევის (ჰიპერტენზიის) სამკურნალოდ. პრეპარატი ინიშნება იმ პაციენტებში, რომლებიც ერთდროულად იღებდნენ ორ სხვადასხვა პრეპარატს ნებივოლოლსა და ჰიდროქლოროთიაზიდს.

2. რა უნდა იცოდეთ ნევილოლი H-ის მიღებამდე

არ მიიღოთ ნევილოლი  H:

• თუ ხართ ალერგიული ნებივოლოლის ან ჰიდროქლოროთიაზიდის ან აღნიშნული პრეპარატის რომელიმე სხვა ინგრედიენტის მიმართ (მითითებულია მე-6 პუნქტში).
• თუ ხართ ალერგიული სულფონამიდის წარმოებული ნივთიერებების მიმართ (როგორიცაა ჰიდროქლოროთიაზიდი, რომელიც არის სულფონამიდების ჯგუფის პრეპარატი).
• თუ აღგენიშნებათ ჩამოთვლილი დარღვევებიდან ერთ­ერთი ან რამდენიმე:
• ძალიან ნელი გულისცემა (წუთში 60 დარტყმაზე ნაკლები);
• გულის შეკუმშვათა რიტმის სხვა სერიოზული დარღვევა (მაგალითად, სინუსური კვანძის სისუსტის სინდრომი, სინოატრიული ბლოკადა, მე­2 და მე­3
  ხარისხის ატრიოვენტრიკულური ბლოკადა);
• ახლად გამოვლენილი ან დამძიმებული გულის უკმარისობა, სისხლძარღვთა უკმარისობის მკურნალობა გულის მწვავე უკმარისობის ფონზე გულის მუშაობის
  გამაუმჯობესებელი ინტრავენური პრეპარატებით.
• დაბალი არტერიული წნევა;
• კიდურების სისხლძარღვებში სისხლის მიმოქცევის გამოხატული დარღვევა;
• არანამკურნალები ფეოქრომოციტომა – თირკმლის ზედა პოლუსის მიდამოში მდებარე სიმსივნე (თირკმელზედა ჯირკვლის სიმსივნე);
• თირკმელების ფუნქციის მძიმე დარღვევა, შარდის გამოყოფის სრული შეწყვეტა (ანურია);
• მეტაბოლური დარღვევები (მეტაბოლური აციდოზი), მაგალითად, დიაბეტური კეტოაციდოზი;
• ასთმა ან სუნთქვის გაძნელება (ამჟამად ან წარსულში);
• ღვიძლის ფუნქციის დარღვევა;
• სისხლში კალციუმის მაღალი დონე, სისხლში კალიუმის დაბალი შემცველობა, სისხლში ნატრიუმის დაბალი შემცველობა ხანგრძლივი დროის განმავლობაში,
  რომელიც არ ექვემდებარება მკურნალობას;
• შარდმჟავას მაღალი შემცველობა და პოდაგრის სიმპტომები;

განსაკუთრებული მითითებები და უსაფრთხოების ზომები

ნევილოლი  H-ის  მიღებამდე გაიარეთ სამედიცინო კონსულტაცია.

აცნობეთ ექიმს თუ აღგენიშნებათ ან განვითარდა შემდეგი შემთხვევები:

• ტკივილი გულ-მკერდის არეში, გამოწვეული გულის სისხლძარღვების მოულოდნელი სპაზმით (პრინცმეტალის სტენოკარდია);
• გულის I ხარისხის ბლოკადა (გულის კუნთში იმპულსების გატარების უმნიშვნელო დარღვევა, რომელიც ზეგავლენას ახდენს გულის რიტმზე);
• გულის შეკუმშვათა სიხშირის გამოხატული დაქვეითება;
• არანამკურნალები გულის ქრონიკული უკმარისობა;
• სისტემური წითელი მგლურა (ორგანიზმის იმუნური სისტემის დაავადება);
• ფსორიაზი (კანის დაავადება, რომელიც ხასიათდება აქერცლილი ვარდისფერი ლაქებით) ამჟამად ან წარსულში;
• ფარისებრი ჯირკვლის მომატებული აქტივობა: ამ შემთხვევაში პრეპარატს შეუძლია გულის შეკუმშვათა სიხშირის მომატების შენიღბვა;
• სისხლის მიმოქცევის დარღვევა კიდურების სისხლძარღვებში, მაგალითად, რეინოს დაავადება ან სინდრომი, ტკივილი სიარულისას, რომელიც გამოწვეულია
  ქვედა კიდურების სისხლძარღვების შევიწროვებით.
• ალერგია: პრეპარატმა შესაძლოა გააძლიეროს ალერგიული რეაქცია მტვერზე ან სხვა ალერგენებზე.
• სუნთქვის ხანგრძლივი გაძნელება;
• შაქრიანი დიაბეტი: პრეპარატმა შესაძლოა შენიღბოს სისხლში გლუკოზის კონცენტრაციის შემცირების სიმპტომები (მაგალითად, გულისცემის გაძლიერება ან
  გახშირება); ექიმი მოგთხოვთ სისხლში შაქრის დონის უფრო ხშირად შემოწმებას   ნევილოლი  H-ის  მიღებისას, რადგანაც საჭირო იქნება ანტიდიაბეტური პრეპარატების დოზის კორექტირება.
• თირკმელების ფუნქციის დარღვევა: მკურნალობის დროს რეკომენდებულია თირკმელების ფუნქციის კონტროლი, მისი მდგომარეობის გაუარესების თავიდან აცილების მიზნით;  თირკმელების ფუნქციის გამოხატული დარღვევისას ნევილოლი  H უკუნაჩვენებია (იხ. პუნქტი „არ მიიღოთ ნევილოლი  H“);
• სისხლში კალიუმის დაბალი შემცველობისას და განსაკუთრებით გახანგრძლივებული QT ინტერვალის სინდრომის დროს (ერთგვარი დარღვევა ეკგ­ზე), ან საგულე
  გლიკოზიდებით მკურნალობისას (გულის, როგორც ტუმბოს ფუნქციის გასაუმჯობესებელი პრეპარატები); სისხლში კალიუმის კონცენტრაციის დაქვეითების
  რისკი იზრდება ღვიძლის ციროზის დროს, შარდმდენი საშუალებებით მკურნალობისას წყლის სწრაფი დაკარგვის დროს, ან საკვებით კალიუმის
  არასაკმარისი რაოდენობის მიღებისას;
• ქირურგიული ოპერაციის ჩატარებისას ანესთეზიამდე აუცილებლად აცნობეთ ექიმ­ანესთეზიოლოგს, რომ თქვენ იღებთ ნევილოლი H -ს.
• თუ გაქვთ კანის კიბო ან მკურნალობის დროს მოულოდნელად გამოვლინდა კანის პათოლოგიური ცვლილებების კერა. ჰიდროქლორთიაზიდის გამოყენებით მკურნალობამ, განსაკუთრებით დიდი დოზებით ხანგრძლივმა მიღებამ, შესაძლოა გაზარდოს კანისა და ტუჩის გარკვეული ტიპის კიბოს (კანის არამელანომური კიბო) განვითარების რისკი. პრეპარატის მიღებისას დაიცავით კანი მზის სხივების და ულტრაიისფერი-გამოსხივების ზემოქმედებისგან.
• თუ გქონიათ ჰიდროქლორთიაზიდის მიღების შემდეგ სუნთქვის ან ფილტვების პრობლემები (მათ შორის ანთება ან სითხის დაგროვება ფილტვებში). ნევილოლი H -ის მიღების შემდეგ ძლიერი ქოშინის ან სუნთქვის პრობლემის განვითარების შემთხვევაში, დაუყოვნებლივ მიმართეთ ექიმს.

მკურნალობის დროს

• ნევილოლი H –ს შეუძლია გაზარდოს სისხლში ლიპიდების და შარდის მჟავას შემცველობა.
• ნევილოლი H–ს შეუძლია შეცვალოს ელექტროლიტების კონცენტრაცია (მაგნიუმი, კალიუმი, ნატრიუმი და  ქლორიდი): ექიმმა შეიძლება რეგულარულად დაგინიშნოთ ანალიზის გაკეთება სისხლში ელექტროლიტების რაოდენობის შესამოწმებლად. ამან შეიძლება გამოიწვიოს სიმპტომები, როგორიცაა: პირის სიმშრალე, წყურვილის შეგრძნება, სისუსტე, დაღლილობა, კუნთების სისუსტე, ტკივილი ან სპაზმი, გაძლიერებული გულისცემა, თავბრუსხვევა, დაბალი არტერიული წნევა, შფოთვა, გულისრევა, ნაკლები რაოდენობის შარდის გამოყოფა. ჩამოთვლილი სიმპტომების გამოვლენისთანავე აცნობეთ ექიმს.
• ნევილოლი H-ში შემავალმა ჰიდროქლოროთიაზიდმა შესაძლოა გამოიწვიოს კანის მგრძნობელობის მომატება მზის სხივების ან ულტრაიისფერი გამოსხივების მიმართ. მკურნალობის დროს გამონაყარის, ქავილის ან კანის მგრძნობელობის
  მომატების შემთხვევაში შეწყვიტეთ ნევილოლი H-ის მიღება და მიმართეთ მკურნალ ექიმს (იხ. ასევე პუნქტი. 4).
• ნევილოლი H-ით მკურნალობის დროს მხედველობის დარღვევის ან თვალების ტკივილის შემთხვევაში აცნობეთ ექიმს. აღნიშნული შეიძლება წარმოადგენდეს თვალის სისხლძარღვოვან შრეში სითხის დაგროვების (ქოროიდული გამონაჟონი)  ან გლაუკომის განვითარების ნიშანს. შეწყვიტეთ   ნევილოლი H-ის მიღება და მიმართეთ სამედიცინო დახმარებას.

ლაბორატორიული კვლევები

• დოპინგ- ტესტი: ნევილოლი H-მა შეიძლება გამოიწვიოს ცრუ დადებითი შედეგი.
• ნევილოლი H-მა შეიძლება მოახდინოს გავლენა პარათირეოიდული  ჯირკვლის ფუნქციის გამოკვლევის პასუხებზე. აღნიშნული კვლევების ჩატარებამდე აცნობეთ ექიმს, რომ ღებულობთ ნევილოლი H-ს.

ბავშვები და მოზარდები

არასაკმარისი მონაცემების გამო ნევილოლი H -ის გამოყენება არ არის რეკომენდირებული ბავშვებსა და მოზარდებში.

ნევილოლი H -ის გამოყენება სხვა მედიკამენტებთან ერთად

აცნობეთ მკურნალ ექიმს ან ფარმაცევტს , თუ ამჟამად იღებთ, ახლო წარსულში იღებდით ან აპირებთ მიიღოთ სხვა პრეპარატები.

აუცილებლად აცნობეთ ექიმს, თუ ნევილოლი H -თან ერთად იღებთ ქვემოთ ჩამოთვლილ პრეპარატებს:

პრეპარატები, რომლებიც ისევე, როგორც ნევილოლი H, ზეგავლენას ახდენს არტერიულ წნევაზე და/ან გულის მუშაობაზე:

• სისხლის წნევის საკონტროლო ან გულის დაავადებების სამკურნალო პრეპარატები (მაგალითად, ამიოდარონი, ამლოდიპინი, ციბენზოლინი, კლონიდინი,
  დიგოქსინი, დილთიაზემი, დიზოპირამიდი, დოფეტილიდი, ფელოდიპინი, ფლეკანიდი, გუანფაცინი, ჰიდროქინიდინი, იბუტილიდი, ლაციდიპინი,
  ლიდოკაინი, მექსილეტინი, მეთილდოპა, მოქსონიდინი, ნიკარდიპინი, ნიფედიპინი, ნიმოდიპინი, ნიტრენდიპინი, პროპაფენონი, ქინიდინი, რილმენიდინი,
  სოტალოლი, ვერაპამილი).
• სედაციური საშუალებები და ფსიქოზების (ფსიქიკური დარღვევების) სამკურნალო პრეპარატები, მაგალითად, ამილსულპირიდი, ბარბიტურატები
  (რომლებიც გამოიყენება ასევე ეპილეფსიის სამკურნალოდ), ქლორპრომაზინი, ციამემაზინი, დროპერიდოლი, ჰალოპერიდოლი, ლევომეპრომაზინი,
  ნარკოტიკული პრეპარატები, ფენოთიაზინი (რომელიც გამოიყენება ასევე გულისრევისა და ღებინების მოსახსნელად), პიმოზიდი, სულპირიდი,
  სულტოპრიდი, თიორიდაზინი, ტიაპრიდი, ტრიფლუოპერაზინი.
• დეპრესიის სამკურნალო პრეპარატები (მაგალითად, ამიტრიპტილინი, ფლუოქსეტინი, პაროქსეტინი).
• საანესთეზიო საშუალებები, რომელიც გამოიყენება ქირურგიული ოპერაციების დროს.
• ბრონქული ასთმის, ცხვირის შეგუბების მოსახსნელი საშუალებები და თვალის გარკვეული დაავადებების, მაგ. გლაუკომის (მომატებული თვალშიდა
  წნევა) სამკურნალო ან გუგის გამაფართოვებელი პრეპარატები.
• ბაკლოფენი (ანტისპაზმური საშუალება).
• ამიფოსტინი (დამცავი საშუალება, გამოიყენება სიმსივნის მკურნალობის დროს).
• ქოლესტირამინი და ქოლესტიპოლი (აქვეითებენ ქოლესტერინის დონეს).

პრეპარატები, რომელთა მოქმედება ან ტოქსიურობა შეიძლება გაიზარდოს ნევილოლი H -თან კომბინაციაში:

• ლითიუმი (რომელიც გამოიყენება გუნება­-განწყობის ნორმალიზებისთვის).
• ცისაპრიდი (გამოიყენება საჭმლის მონელების პროცესების დარღვევების სამკურნალოდ).
• ბეპრიდილი (გამოიყენება სტენოკარდიის სამკურნალოდ).
• დიფემანილი (გამოიყენება მომატებული ოფლიანობის დროს).
• ინფექციების სამკურნალო პრეპარატები: ერითრომიცინი (ინტრავენური ან ინტრამუსკულური), პენტამიდინი და სპარფლოქსაცინი, ამფოტერიცინი და
  პენიცილინი G (ნატრიუმის მარილი), გალოფანტრინი (გამოიყენება მალარიის დროს).
• ვინკამინი (გამოიყენება ტვინში სისხლის მიმოქცევის დარღვევებისას).
• მიზოლასტინი და ტერფენადინი (გამოიყენება ალერგიის სამკურნალოდ).
• შარდმდენი და საფაღარათო საშუალებები.
• მწვავე ანთების სამკურნალო პრეპარატები: სტეროიდები (მაგალითად, კორტიზონი და პრედნიზონი), ACTH (ადრენოკორტიკოტროპული ჰორმონი) და
  სალიცილის მჟავას წარმოებულები (მაგალითად, აცეტილსალიცილის მჟავა/ასპირინი და სხვა სალიცილატები).
• კარბენოქსოლონი (გამოიყენება გულძმარვისა და კუჭის წყლულოვანი დაავადების სამკურნალოდ).
• კალციუმის მარილები (რომლებიც გამოიყენება საკვები დანამატების სახით ძვლების გასამაგრებლად).
• კუნთების მოსადუნებელი პრეპარატები (მაგალითად, ტუბოკურარინი).
• დიაქსოზიდი (რომელიც გამოიყენება სისხლში შაქრის დაბალი შემცველობისას და მომატებული არტერიული წნევის დროს).
• ამანტადინი (ანტივირუსული პრეპარატი).
• ციკლოსპორინი (იმუნური სისტემის დამრგუნველი საშუალება).
• იოდის შემცველი კონტრასტული ნივთიერებები (გამოიყენება კონტრასტული რენტგენოგრაფიისათვის).
• კიბოს სამკურნალო პრეპარატები (მაგალითად, ციკლოფოსფამიდი, ფტორურაცილი, მეთოტრექსატი).

პრეპარატები, რომელთა მოქმედება შეიძლება შემცირდეს ნევილოლი H -თან კომბინაციაში გამოყენებისას:

• პრეპარატები, რომლებიც აქვეითებს სისხლში შაქრის შემცველობას (ინსულინი და პერორალური დიაბეტის საწინააღმდეგო პრეპარატები, მეტფორმინი).
• პოდაგრის სამკურნალო პრეპარატები (მაგალითად,ალოპურინოლი, პრობენიციდი და სულფინპირაზონი).
• ნორადრენალინის მსგავსი პრეპარატები (გამოიყენება დაქვეითებული არტერიული წნევის ან შენელებული პულსის დროს).

ტკივილგამაყუჩებელი და ანთების საწინააღმდეგო (არასტეროიდული ანთების საწინააღმდეგო საშუალებები) პრეპარატები, რომლებსაც შეუძლია შეამციროს
ნევილოლი H – ის ჰიპოტენზიური ეფექტი.

პრეპარატები, რომლებიც გამოიყენება მომატებული მჟავიანობისა და წყლულოვანი დაავადების დროს (ანტაციდები), მაგალითად. ციმიტედინი, ომეპრაზოლი:

ამ პრეპარატების გამოყენება ნევილოლი H-თან ერთად არ არის რეკომენდებული შესაძლო არასასურველი ურთიერთქმედების გამო.

ნევილოლი  H-ის მიღება სასმელთან  ერთად

ნევილოლი  H-ით მკურნალობისას ალკოჰოლის მიღების დროს სიფრთხილეა საჭირო, რადგან ამ შემთხვევაში შესაძლებელია განვითარდეს თავბრუსხვევა ან გულის წასვლა. აღნიშნული მოვლენების განვითარების შემთხვევაში რეკომენდებულია მკურნალობის განმავლობაში არ მიიღოთ ალკოჰოლური სასმელები, მათ შორის ღვინო, ლუდი ან ალკოპოპები.

ორსულობა და ლაქტაცია

თუ ხართ ორსულად ან ძუძუთი კვებავთ ბავშვს, ფიქრობთ, რომ ხართ ორსულად ან გეგმავთ ბავშვის ყოლას, გაიარეთ სამედიცინო კონსულტაცია პრეპარატის მიღებამდე.

როგორც წესი, ექიმი დაგინიშნავთ სხვა პრეპარატს  ნევილოლი  H-ის ნაცვლად, რადგანაც ნევილოლი  H-ის მიღება არ არის  რეკომენდირებული ორსულობისას. ეს იმიტომ, რომ ნევილოლი  H კვეთს  პლაცენტას და მისმა გამოყენებამ ორსულობისას შეიძლება დააზიანოს ნაყოფი.

ნევილოლი  H-ის მიღება არ არის  რეკომენდირებული ლაქტაციის პერიოდში.

სატრანსპორტო საშუალებების მართვა ან მექანიზმებთან მუშაობა

აღნიშნულმა პრეპარატმა შეიძლება გამოიწვიოს თავბრუსხვევა ან დაღლილობა. აღნიშნულ შემთხვევაში, არ მართოთ საჭე და არ გამოიყენოთ სხვადასხვა მექანიზმები ან ინსტრუმენტები.

ნევილოლი  H შეიცავს ლაქტოზას

ნევილოლი  H შეიცავს ლაქტოზას. თუ ექიმმა გითხრათ, რომ გაქვთ ზოგიერთი შაქრის აუტანლობა, აღნიშნული პრეპარატის მიღებამდე მიმართეთ ექიმს.

3. როგორ მივიღოთ ნევილოლი H

მოცემული პრეპარატის მიღებისას ყოველთვის ზუსტად შეასრულეთ ექიმის მითითებები. აღნიშნულ საკითხზე ეჭვის შემთხვევაში მიმართეთ მკურნალ ექიმს.

რეკომენდირებული დოზა: 1 ტაბლეტი დღეში, სასურველია ერთსა და იმავე დროს, წყალთან ერთად.

ნევილოლი  H -ის მიღება რეკომენდებულია  უზმოზე, ჭამამდე სულ მცირე 30 წუთით ადრე.

ნევილოლი  H 5მგ/12.5მგ შემოგარსული ტაბლეტები მხოლოდ:

თუ გიჭირთ მთლიანი ტაბლეტის გადაყლაპვა,  შესაძლებელია ტაბლეტის  გაყოფა.

ბავშვები და მოზარდები

ნევილოლი H -ის გამოყენება არ არის რეკომენდირებული ბავშვებსა და მოზარდებში.

დოზის გადაჭარბება

დოზის გადაჭარბების შემთხვევაში დაუყონებლივ დაუკავშირდით ექიმს ან ფარმაცევტს. დოზის გადაჭარბების ყველაზე გავრცელებული სიმპტომები და ნიშნებია შენელებული გულისცემა  (ბრადიკარდია), დაბალი არტერიული წნევა,  გულისწასვლა, ქოშინი, გულის მწვავე უკმარისობა, გადაჭარბებული შარდვა, შემდგომი დეჰიდრატაციით, გულისრევა და ძილიანობა, კუნთების სპაზმი, გულის რიტმის დარღვევები (განსაკუთრებით თუ ღებულობთ საგულე გლიკოზიდებს ან გულის რიტმის დარღვევის სამკურნალო საშუალებებს).

დოზის გამოტოვება

თუ დაგავიწყდათ პრეპარატის მიღება, მიიღეთ როგორც კი გაგახსენდებათ. მაგრამ, თუ ამის შესახებ გაგახსენდათ საკმაოდ გვიან (მაგალითად დანიშნული დროდან რამდენიმე საათში) და მოახლოებულია შემდეგი დოზის მიღების დრო, დაიცადეთ და ტაბლეტი მიიღეთ დანიშნულ დროს. ნუ მიიღებთ ორმაგ დოზას გამოტოვებული დოზის კომპენსაციის მიზნით. შეეცადეთ, მიიღოთ პრეპარატი დანიშნულ დროს, გამოტოვების გარეშე.

ნევილოლი H -ის  მიღების შეწყვეტა

ნევილოლი H -ის  მიღების შეწყვეტამდე კონსულტაციისათვის მიმართეთ მკურნალ ექიმს.
მკურნალობასთან დაკავშირებულ ნებისმიერ საკითხზე რჩევისათვის მიმართეთ ექიმს ან ფარმაცევტს.

4. მოსალოდნელი გვერდითი ეფექტები

ყველა სხვა მედიკამენტის მსგავსად, აღნიშნულმა პრეპარატმაც შესაძლოა გამოიწვიოს გვერდითი ეფექტები, თუმცა არა ყველა პაციენტში.

შემდეგი გვერდითი რეაქციების განვითარების შემთხვევაში შეწყვიტეთ  ნევილოლი H -ის მიღება და დაუყონებლივ მიმართეთ ექიმს:

• სისტემური ალერგიული რეაქციები კანზე გენერალიზებული გამონაყარით (ჰიპერმგრძნობელობითი რეაქციები); უეცარი შეშუპება, განსაკუთრებით ტუჩებისა
  და თვალების არეში, ენის შეშუპება სუნთქვის უეცარი გაძნელებით (ანგიონევროზულიშეშუპება). უცნობი სიხშირის (გამოვლენის სიხშირე ვერ დადგინდა არსებული მონაცემების საფუძველზე ).
• მწვავე რესპირატორული დისტრესი (ნიშნები: მძიმე ქოშინი, ცხელება, სისუსტე და კონფუზია). სიხშირე: ძალიან იშვიათი (შეიძლება გამოვლინდეს 10.000-დან 1 პაციენტში).

ნებივოლოლის გამოყენებისას დაფიქსირდა შემდეგი გვერდითი მოვლენები:

ხშირი ( ვლინდება 10-დან 1 პაციენტში):

• თავის ტკივილი;
• თავბრუსხვევა;
• დაღლილობა;
• უჩვეულო წვის, ჩხვლეტის, ქავილის ან დაბუჟების შეგრძნება;
• დიარეა;
• ყაბზობა;
• გულისრევა;
• ქოშინი;
• მტევნებისა ან ტერფების შეშუპება.

არახშირი  ( ვლინდება 100- დან 1 პაციენტში):

• პულსის შენელება ან სხვა ცვლილება გულის მხრივ;
• დაბალი არტერიული წნევა ;
• ტკივილი სიარულისას ქვედა კიდურებში;
• მხედველობის დარღვევა;
• იმპოტენცია;
• დეპრესია;
• საჭმლის მონელების დარღვევა, გაზების დაგროვება კუჭში ან ნაწლავებში, ღებინება;
• გამონაყარი კანზე, ქავილი;
• სუნთქვის გაძნელება (როგორც ბრონქული ასთმის დროს), რაც გამოწვეულია სასუნთქი გზების კუნთების უეცარი სპაზმით (ბრონქოსპაზმი);
• კოშმარული სიზმრები.

ძალიან იშვიათი ( ვლინდება 10.000- დან 1 პაციენტში ):

• გულის წასვლა
• ფსორიაზის გამწვავება (კანის დაავადება, რომელიც ვლინდება აქერცლილი ვარდისფერი ლაქებით).

უცნობი სიხშირის  (სიხშირე ვერ დადგინდა არსებული მონაცემების საფუძველზე ):

ერთეულ პაციენტებში გამოვლინდა ქვემოთ აღნიშნული გვერდითი მოვლენები:

• ქავილი, გამონაყარი, წითელი ლაქები (ურტიკარია).
• მცდარი აღქმა (ჰალუცინაციები).
• რეალობასთან კავშირის დაკარგვა (ფსიქოზი).
• სუსტი სისხლმიმოქცევა ხელებსა და ფეხებში, ხელისა და ფეხის თითების ფერის შეცვლა, სიფერმკთალე და ჩხვლეტის შეგრძნება (რეინოს სინდრომი).
• თვალების სიმშრალე, უთუთოების ან სკლერების დანაოჭება ან გასქელება

ჰიდროქლოროთიაზიდის გამოყენებისას დაფიქსირდა შემდეგი გვერდითი მოვლენები:

კეთილთვისებიანი, ავთვისებიანი და დაუდგენელი ახალწარმონაქმნები (მათ შორის კისტები და პოლიპები):

უცნობი სიხშირის (გამოვლენის სიხშირე ვერ დგინდება არსებული მონაცემებით):

• კანისა და ტუჩის კიბო (კანის არამელანომური კიბო)

ალერგიული რეაქციები:

• სისტემური ალერგიული რეაქციები (ანაფილაქსიური რეაქცია).

გულ­სისხლძარღვთა სისტემა

• გულის რიტმის დარღვევა, პალპიტაცია;
• ცვლილებები ელექტროკარდიოგრამაზე;
• მოულოდნელი გულის წასვლა ადგომისას, სისხლის კოლტების წარმოქმნა ვენებში (თრომბოზი) და ემბოლია, სისხლძარღვოვანი კოლაფსი (შოკი).

სისხლი

• სისხლის უჯრედების კონცენტრაციის შეცვლა, მაგალითად, ლეიკოციტების, თრომბოციტების, ერითროციტების რაოდენობის შემცირება; ძვლის ტვინში
  სისხლწარმოქმნის დარღვევა;
• სითხის (გაუწყლოება) და ელექტროლიტების შემცველობის შეცვლა ორგანიზმში, კერძოდ, კალიუმის, ნატრიუმის, მაგნიუმის, ქლორის დონეების დაქვეითება
  და კალციუმის დონის მომატება;
• შარდმჟავას დონის მომატება, პოდაგრა, სისხლში გლუკოზის დონის მომატება, შაქრიანი დიაბეტი, მეტაბოლური ალკალოზი (ნივთიერებათა ცვლის
  დარღვევა), ქოლესტერინის და/ან ტრიგლიცერიდების დონის მომატება.

კუჭ­ნაწლავი 

• მადის დაკარგვა, პირის სიმშრალე, გულისრევა, ღებინება, დისკომფორტი კუჭის მიდამოში, მუცლის ტკივილი, დიარეა, ნაწლავების მოძრაობითი
  აქტივობის დაქვეითება (ყაბზობა), ნაწლავების მოძრაობითი აქტივობის შეწყვეტა (ილეუსი), მეტეორიზმი.­
• სანერწყვე ჯირკვლების ანთება, კუჭქვეშა ჯირკვლის ანთება, სისხლში ამილაზის (კუჭქვეშა ჯირკვლის ფერმენტი) დონის მომატება;
• კანის გაყვითლება (სიყვითლე), ნაღვლის ბუშტის ანთება.

გულ­-მკერდი

• რესპირატორული დისტრესი, ფილტვის ქსოვილის ანთება (პნევმონიტი), ფილტვებში ფიბროზული ქსოვილის წარმოქმნა, (ფილტვების ინტერსტიციული
  დაავადება), სითხის დაგროვება ფილტვებში (ფილტვების შეშუპება).

ნერვული სისტემა

• ვერტიგო (ტრიალის შეგრძნება);
• კონვულსია, გონების დაბინდვა, კომა, თავის ტკივილი, თავბრუსხვევა;
• აპათია, ცნობიერების დაბინდვა, დეპრესია, ნერვოზულობა, მოუსვენრობა, ძილის დარღვევა;
• უჩვეულო წვის, ჩხვლეტის, ქავილის ან დაბუჟების შეგრძნება;
• კუნთების სისუსტე (პარეზი).

კანი და თმა

• ქავილი, წითელი ლაქები/გამონაყარი კანზე (პურპურა), ჭინჭრის ციება (ურტიკარია), კანის მგრძნობელობის მომატება მზის სხივების მიმართ,
  გამონაყარი (მათ შორის მულტიფორმული ერითემა), გამონაყარი სახეზე და/ან ლაქოვანი გამონაყარი, რომელსაც თან ახლავს ნაწიბურების წარმოქმნა (კანის სისტემური წითელი მგლურა), სისხლძარღვების ანთება მათი კედლების შემდგომი კვდომით (მანეკროზირებელი ვასკულიტი), კანის აქერცლა, გაწითლება, ბუშტუკების წარმოქმნა, კანის აშრევება (ტოქსიური ეპიდერმული ნეკროლიზი).

მხედველობისა და სმენის ორგანოები

• გარემოს აღქმა ყვითელ ფერში, არამკვეთრი მხედველობა, ახლომხედველობის გაუარესება, ცრემლდენის შემცირება, მხედველობის დაქვეითება და თვალების ტკივილი (თვალის სისხლძარღვოვან შრეში  სითხის დაგროვების (ქოროიდული გამონაჟონი), მწვავე მიოპიის  ან მწვავე დახურულკუთხოვანი გლაუკომის განვითარების შესაძლო ნიშანი).

სახსრები და კუნთები

• კუნთების სპაზმი, კუნთების ტკივილი.

შარდგამომყოფი სისტემა

• თირკმელების ფუნქციის დარღვევა, თირკმელების მწვავე უკმარისობა (შარდის წარმოქმნის შემცირებით და ორგანიზმში სითხისა და შლაკების დაგროვებით),
  თირკმელების შემაერთებელი ქსოვილის ანთება (ინტერსტიციული ნეფრიტი), შარდში გლუკოზის არსებობა.

სასქესო სისტემა

• ერექციის დარღვევა.

სისტემური მოვლენები/სხვა

• ზოგადი სისუსტე, მომატებული დაღლილობა, ტემპერატურის მომატება, წყურვილი.

შეტყობინება  გვერდითი ეფექტების შესახებ

თუ შენიშნავთ რომელიმე გვერდით მოვლენას, მათ შორის ისეთ ეფექტებს, რომლებიც არ არის აღწერილი გამოყენების ინსტრუქციაში, აცნობეთ ექიმს ან ფარმაცევტს. გვერდითი ეფექტების შესახებ შეგიძლიათ განაცხადოთ პირდაპირ საქართველოს ეროვნული სისტემის მეშვეობით. გვერდითი ეფექტების შესახებ შეტყობინებით თქვენ უზრუნველყოფთ აღნიშნული მედიკამენტის უსაფრთხოების შესახებ მეტ ინფორმაციას.

5. როგორ შევინახოთ ნევილოლი H

აღნიშნული პრეპარატი შეინახეთ  სინათლის და ბავშვებისთვის მიუწვდომელ ადგილას.

აღნიშნული პრეპარატი არ საჭიროებს შენახვის განსაკუთრებულ პირობებს.

არ გამოიყენოთ აღნიშნული პრეპარატი კოლოფსა და ბლისტერზე მითითებული ვარგისიანობის ვადის გასვლის შემდეგ.  ვარგისიანობის ვადა ვრცელდება აღნიშნული თვის ბოლო დღემდე.

მედიკამენტები  არ გადაყაროთ კანალიზაციაში ან საყოფაცხოვრებო ნარჩენებთან ერთად. ჰკითხეთ ფარმაცევტს მისი უტილიზაციის შესახებ.  აღნიშნული ზომები ხელს შეუწყობს გარემოს დაცვას.

6. შეფუთვის შემცველობა და დამატებითი ინფორმაცია

რას შეიცავს ნევილოლი  H:

ნევილოლი  H (Nevilol H) 5მგ/12.5მგ შემოგარსული ტაბლეტები

• აქტიური ნივთიერებებია ნებივოლოლი და ჰიდროქლორთიაზიდი

თითოეული შემოგარსული ტაბლეტის შემადგენლობაში შედის 5მგ ნებივოლოლი (ნებივოლოლის ჰიდროქლორიდის სახით) და 12.5 მგ ჰიდროქლოროთიაზიდი.

ნევილოლი  H (Nevilol H) 5მგ/25მგ შემოგარსული ტაბლეტები

• აქტიური ნივთიერებებია ნებივოლოლი და ჰიდროქლორთიაზიდი

თითოეული შემოგარსული ტაბლეტის შემადგენლობაში შედის 5მგ ნებივოლოლი (ნებივოლოლის ჰიდროქლორიდის სახით) და 25 მგ ჰიდროქლოროთიაზიდი.

• სხვა ინგრედიენტებია:
• ტაბლეტის ბირთვი: ლაქტოზის მონოჰიდრატი, პოლისორბატი 80, ჰიპრომელოზა (13.6 mPas), სიმინდის სახამებელი, მიკროკრისტალური ცელულოზა, ლიმონმჟავას მონოჰიდრატი, კოლოიდური უწყლო სილიციუმი, მაგნიუმის სტეარატი.
• გარსი: ოპადრი თეთრი 03A580004 [5/12.5 მგ მხოლოდ], ოპადრი ყვითელი 03A520012 [5/25 მგ მხოლოდ], ჰიპრომელოზა (6 mPas), ტიტანის დიოქსიდი (E171), პოლიოქსილის (მაკროგოლი) სტეარატი, მიკროკრისტალური ცელულოზა, რკინის ოქსიდი  ყვითელი (E172) [5/25 მგ მხოლოდ].

ნევილოლი  H -ის გარეგნული სახე და შეფუთვის შემადგენლობა

ნევილოლი  H 5მგ/12.5მგ: თეთრი- მოთეთრო ფერის, 9.2მმ, მრგვალი, ორმხრივ ამობურცული შემოგარსული ტაბლეტები, ერთ მხარეს გამყოფი ჭდით და მეორე მხარეს  აღნიშვნით „515“.

გამყოფი ხაზი განკუთვნილია მხოლოდ გადაყლაპვის გაადვილების მიზნით ტაბლეტის გასაყოფად და არა ტაბლეტის თანაბარ დოზებად გასაყოფად.

ნევილოლი  H 5მგ/25მგ: ღია ყვითელი ფერის, 9.2მმ, მრგვალი, ორმხრივ ამობურცული შემოგარსული ტაბლეტები, ერთ მხარეს აღნიშვნით „525“.

შეფუთვის ზომები: 30 შემოგარსული ტაბლეტი.

ტაბლეტები წარმოდგენილია ბლისტერულ შეფუთვაში.

ყველა ზომის შეფუთვა შეიძლება არ იყოს ხელმისაწვდომი ბაზარზე.

სავაჭრო ლიცენზიის მფლობელი და მწარმოებელი

სავაჭრო ლიცენზიის მფლობელი:

გაცემის წესი:

ფარმაცევტული პროდუქტის ჯგუფი – II , გაიცემა ფორმა №3 რეცეპტით

შპს ნიუ ფარმა

მისამართი: საქართველო, თბილისი 0154, ევდოშვილის ქ.#18

მწარმოებელი:

Fine Foods & Pharmaceuticals N.T.M. S.P.A.

იტალია, ბრემბეიტი (BG), გრინიანოს ქ. 43 -24041